Heb 4 | MCQ | STEP | Nú va'e 'ojuta hwehunijaho Godi nahama 'waramana'omo majama ija'ina namu. Ijihuni maijaho ja ea 'ahopo ijí pavahuni jihuna'e tea junumuna.

Hebrews 4

1 Nú va'e 'ojuta hwehunijaho Godi nahama 'waramana'omo majama ija'ina namu. Ijihuni maijaho ja ea 'ahopo ijí pavahuni jihuna'e tea junumuna. 2 Godira 'ojuta hwehuni tinijaho amairiaramana. 'Ena'omo ijaho vu'a maa maiu'ina ka'ene iviamaa nú 'warumukaho nikwisu'ina kaji pu 'waravara. 'Enakaivo ijí vu'a kajara pu ni'ajihuna pana. Ijihuni maijaho Godira raka ka'ene 'waramajaho pu panimaa rojara. 3 'Enavo nú ea ka'ene nimai roji'inijiru ijí Huni 'ojuta hwena hijuri tinijaho vahuna kaivo ea ka'ene panimai roji'inijija Godi ika'ina 'waramana.

Nuni sena vajijino ika'ina 'waravuta. Pu niho'o pava'e Nuni tinia ka'ene 'ojuta hwehunijaho use'eja 'iamana.
4 Nú nihejura. Godoni ira vaji vea iropu no'o ijí rone ika'ina 'waramana. Na kaukara vena va'u va'u vea iropu no'o ijaho 'ojuta hwena hijuta 'iamana. 5 'Ene Godoni ira pina vaji ika'ina 'waramana. Pu Nuni 'ojuta hwena hijuri tinijaho pava'e use'eja 'iamana. 6 Ijihuni hahi Godoni 'ojuta hwejuri tinijara namujaho emaapo ijí vahuni jihuna'e namu. 'Enakaivo ea ka'ene marako vu'a maa maiu'inake hejajija pu tinia kajaho pava'ara. Ijihuni maijaho pu Godi panimaa rojara. 7 Ijihuni hahi 'ojuta hwena hihuni tiniji vahuna'e Hu vea pina amairia ranamana. 'Ena'omo vea kajaho iviamaina. Godira vu'a ka'ene nimarako pu 'waramajaho Hu kú'o Teviti 'waramarena ika'ina 'waramana.

Iviasi ja Huni ira hena ve'avara vo joni oja paveje kisina re'ama 'wamana.
8 Ike 'ojuta hwena hihuni tinia maiu'inakaho Kenani Josuara aherama va'e arumajaho parona 'waravu. Ijí tinia kaji re'ipisa Godiho 'ojuta hwena hihuni tinia pina parona 'warava'a. 9 Ijihuna'e vea pina namuna'omo Godoni ehija Sapati kaji 'ojuta hwehuna. 10 'Ena'omo ea irara Godoni 'ojuta hwejuri tinia kaji va'ajaho huni kaukara ka'ene venajara pa'arejume 'ojuta hwe'iro va'ana. Areri Godira Huni kaukara ve paramarena 'ojuta hwena ja'ina'e hwenana. 11 Ijihuni hahi nú harura venareje ijí 'ojuta hwena hihuna kaji vahuna. 'Enavo ea irahipo panimaa ro'avajaho areri Isureri opo panimaa rojaja'ina'e ve'ava jihuna'e pu tinia kajaho pavahuna. 12 Godoni irijaho mai'o hiji'ini harurijara itu'o'una paranana. Huni enijaho so'wa ka'ene 'ena ronu ronujaho asitaha paranana. 'Ena'omo so'wa kajihuni enijara nuni ura 'ee vwihijaho 'uhua aruma va'e 'e'uhuna. 'Enareje núni oja ichá'inijaho najuha parahuna. 13 Uneunecha mapoka ka'ene venaji paki'eje nahuna pa'amaa. 'Ene uneunecha mapokakija Huni nia 'ahijaho samaumaa areri maisu namijuja'ina. Ike Godikara raka ka'ene nú vejujaho veje samaahiravakame nú ijihuni maijaho Hu 'warahuna.

Jesuho Ni'ajúhi'ina Natohwa Ka'ene Arira Nimaa Nimaijina

14 Ijihuni hahi Jesu ka'ene Godoni Harihijaho núni Ni'ajúhi'ina Mavarasa'ina Ni'ima'urijara akúpi 'ahi va'ana. 'Ena'omo nú ijihuna'e Hu ija kisi 'uname nimaa roji'i hina apena vahuna. 15 Ike núni Ni'ajúhi'ina Ni'ima'urakara núni ajuasinijaho hena kamuna. Ijihuni maijaho venakúa ka'ene nú va'e aruvukaho Hu 'u'o ija'ina va'e arumana vo Hu sisea kwinu pavenana. 16 'Enakúne núni Godi mavwihanúa aremu jihuni toronu rori paju'ika'i Huni una'i va'ajiva. 'E'avajihuna'e Huni numisaraa 'ee mavwihanii'inijaho nú pivusa'avajaho Hu ni'ajúha vajúhuna.